اسرار حلويات اللوز من مطبخ مريم الزهراء

مرحبا بكم

موقع أم مروان يقدم لكم

اسرار حلويات اللوز من مطبخ مريم الزهراء

اسرار حلويات اللوز من مطبخ مريم الزهراء

عجين حلويات اللوز :

كل ما كانت رقيقة بزاف كلما كتبان وزينة وعاطيا منظر غزال اللي فيها ماتدلك دلك علا قلبها واللي عندها الماكينة أيكون أحسن بالنسبة اللي غاتدلك بالمدلك ديما العجينة نعملوها بين زوج ميكات أو ورقات السولفريزي نحاولو ما أمكن مانوصلوش للدقيق باش ماتقصاحش معانا العجينة وتبقى طرية وأحسن حجا نستعملو هو النشا ملي كذلك نقطعو بالمريشمات تاهما ندوزاهم فيه باش يسهل علينا ومايلصقش معانا. 

عقدة اللوز:

وهي الأهم هي اللي كتخلي مذاق الحلوة عموما عندو مذاق رائع مثلا إلا كنا غادي نعملو من كيلو نتاع اللوز أشكال متعددة فيستحسن كل شكل نخصص ليه نكهة تميزو علا بقية الأشكال (روح اللوز،البنان،الڤاني،الفريز،البيستاش،قشور الليمون أو الحامض،،،،) المهم اللي متوفر ثانيا اللوز نفسخوه ونخليوه حتي ينشف من الماء كنخليه يوماين عاد نطحن وٍ حتى يلين ويولي غبرة المرة الأولى بوحدو والثانية مع السكر واللي بغات تزيد الثالثة أيكون أحسن

بالنسبة ليا مثلا فهاد الحلويات استعملت 1/2 kg لوز وطحنتو مع 200g سنيدة رقيقة باش مايجي حلو والسر اللي تيخلي العقدة تجئ معلكة وبنينة هو نضيفو ملعقة كبيرة كونفتير مشماش مطحون لكل نص كغ لوز طبعا .

أما العجينة فكن عمل واحد الطريقة زوينة كندخل الزبدة الكونجيلاتور تجمد شوية ونكحها فالحكاكة د ماطيشة من بعد كنعبر قياس الفورص ونعمل معاه ديك الزبدة حتا تندمج معا الدقيق وناخدو غربال ولا صفاية عيونها كبار شوية ونغربلو داك الشي هاد الطريقة مزينة تتخلي العجينة لينة ورطبة حاجة أخرى كتعلق بماء الزهر نستعمل وٍ نوعية جيدة وايكون بارد باش نجمعو بيه العجينة والاهم من دالك منزربوش علا العجينة بالما حقاش رآه الزبدة كافية باش تجمعها غير ألما الزهر تيعطيها النسمة ويجمعها مزيان وندلكوها حتا تشد رأسها ونسد وٍ عليها فكيس بلاستيكي ورآها غاترطب غير وحدها وتولي رطبة ولينة،

نخليوها ترتاح فالثلاجة شئ ساعة أو أكثر عاد نخدموها أودبا غادي نحط المقادير اللي كنستعمل :

عجين حلوياتا للوز: 500g دقيق فورص

 +125g زبدة

+ 2 مع ك سكر گلاصي 

+ شوية ملح

 + ماء الزهر لجمع العجين 

عقدة حلويات اللوز: 500g لوز

 ً+ 200g سنيدة

وشوية المسكة الحرة مانكتروش منها باش متطلقش المر ديالها

+50& 100 زبدة بحسب نوعية اللوز واش ميدم ولا ناشف أنا استعملت 90g

+ مع ك كونفتير مشمش مطحون ويكون سائل

نجيو دابا لشرح حلوة من أبسط ما يكون بحيت صورتها مع المراشم المستعملة فيها تعملي دائرة من العجين وتوضع فوقها أصبع من عقدة اللوز بعد مانكونو دهنا بأبيض البيض نجمعه الجوانب ونقطعو وريدات تاهما قبل مانوضعوهم ندهنو بلاصتهم بأبيض البيض وهذا ماكان 

دأبا هاد الشكل سميتو الثويمة أنا كنستعمل المرشم نتاعو اللي معندهاش تحاول تعمل دوك الشرطات غير بالسكين غير هو حاولو ما أمكن باش ايجيو مقادين هاد المرشم تنحدد بيه ومن بعد تنزيد نفلحهم المهم نعملو دائرة من العجين نضع كويرة من العقدة نجمعو الأطراف باش نديرو كرة هاداك الشي اللي جمعناه هو اللي أيكون التحت باش مايبانش التكماش من الفوق ورآه مصورة الطريقة بالتفصيل

دابا نوري لكم هاد الكموصة فالصراحة يمكن لكن تعملو غير دائرة وحدة من العجين ولكن أنا بغيت نجرب. نعمل زوج عجبني منظرها هاكا تنقطعو زوج دوائر نلصقو بعضهم بالبيض. نححطو كويرة من العقدة ونجمعوها بحال الصرة وصافي مفهومة وهادي صورة تطبيقه

ساهلة تيخص غير المنقاش الصورة كتوضيح تنقطع دائرة من العجين نعمل وسطها كويرة من العقدة تدهن بأبيض البيض نلفوها بحال الكورة داك التكماش نعملوه التحت نبركو عليها شوية نقطع وريدات بالمرشم نلصقهم بالبيض وننقش بالمنقاش 

الحلوة الموالية هي القرن نفس الطريقة المتبعة تنشملو العقدة بهاد الشكل باش تولي معانا كي القرن ونجمعو ليها الأطراف ونقادوها مزيان ونلصقو فيها وريدات ملي طيب نغطسو رأسها فالشكلاط أو العسل أو النباج الحاجة اللي تلصق لينا اللوز محمر وهدي صورة الشكل

نمرو دابا للشكل الموالي من أسهل ما يكون تنعمللو قضيب من عقدة اللوز نكونو مسرحين العجينة ندهنوها بالبيض ونلفو عليها القضيب ونبدأ نقطعو فيها علا داك الشكل المبين فالصورة ونلصقو لوريدات

هادي تتسما حلوة العرايش تاهيا منظرها زوين صورتها بالتفصيل الممل والطريقة باينة

تعملوا زوج دوائر وحدة أكبر من الأخرى وتلصق بالبيض نحذو العقدة علا شكل حرفY نجمعو غير العجينة من الوسط ونوضعو وريدات بعد مانكونو لصقناهم بالبيض

دابا شكل حلوة الياسمينة. فالحقيقة تايلزمو المرشم ديالو ولكن اللي بغات تعمل الشكل تنقل عليه فالورق المقوى البلاستيكي ايجيها مزيان غير هو ماغايكونش مسربي بحال المرشم على أي شوفو الصور

وهكذا نكون كملت معاكم جميع الأشكال اللي فلبلاطو نتمنى يعجبكم هاد الشي اللي قدمت لكم 

لازم هاد الحلوة تبقي ليلة كاملة عاد نطيبوها مانخليوهاش تحمر غير تشد فراسها وصافي هادي اول مرة استغنيت عن الألوان الاصطناعية وقضيت غير بغبرة الكاكاو فالصراحة عجبتني وغانبقا هي اللي ندير إلا بغيتو تعملوها بحالي نعطيكم الطريقة

ملي خلطت جميع المقادير النشفة مع الزبدة وترمل الدقيق ودخل من الزبدة نقصت حولي ثلث الخليط وضفت عليه شئ زوج معالق كاكاو مر نوع جيد وبقيت نضيف الماء الزهر حتا جمعت العجين